Antropologoa da Oier Araolaza. Baita dantzaria eta kazetaria ere. Bere doktoretza-tesian dantza ikertu zuen, eta “Genero-identitatea euskal dantza tradizionalaren eraikuntzan” izeneko liburua argitaratu zuen. Dantzan elkarteko arduraduna da.
Kirola antropologiaren begiradatik aztertzeko eskatu diogu Oier Araolazari. Lehiari begiratu dio, batez ere. Kirolean lehia motibazio moduan erabiltzen den arren, gizartean zein maila pertsonalean uzten duen arrastoa aztertu du. Haren gogoetek ez dute inor epel utziko.
Ez dira konparagarriak mendebaldeko gizartean kirolak duen boterea eta dantzak duena, ezta transmititzen dituzten balioak ere. Dantzaren funtzio sozialak aldarrikatzen ditu Oier Araolaza antropologoak, komunitateen zein pertsonen garapenerako gakoa ikusten baitu. Besteak beste, gazteen garunean plastikotasun neuronala handitzen du.
