Maitane Ormazabal Esnaola

Maitane Ormazabal psikologoa gazteen osasun mentalari kalte egiten dioten faktoreak identifikatzeko eta gizarteratzeko lanean murgilduta dago. Azkenaldian, lehengo mailako futbol-taldeekin eta elitean dabiltzan kirolariekin aritu da lanean, kirolean izaten diren presio-dinamikek gazteengan zer-nolako eragina duten azaleratzen. Kirolari osasun mentala indartzeko potentzial handia ikusten badio ere, gaur egun presio handiko eremua bihurtu dela uste du.

Gazteen osasun mentala eta emozionala zaintzen duen kirola irudikatzen saiatu da Maitane. Haren ustez, gazteei beren zaurgarritasuna erakusteko baimena ematen dien kirola da etorkizuna. Baina argi du: entrenatzaileek prestakuntza psikologikoa eta emozionala behar dute horretarako. Nerabezaroa eta nerabeak ulertu behar dituzte. Batzuek hasi dira jada bide horretan, eta aldaketa pauso txiki baina sendo horien eskutik etorriko dela azpimarratu du.