Maitane Ormazabal Esnaola

Maitane Ormazabal psikologoa da, eta oso ondo ezagutzen ditu osasun mentalak ezkutatzen dituen zirrikituak. Guraso zein gazteekin hezkuntza-programak jarri ditu martxan Euskal Herriko herri eta eskola ugaritan, eta gazteen belaunaldi hau oso ausarta dela dio. Helduok astintzera etorri dira: “Orain arte, helduok bizi izan gara gizarte anestesiatu batean, non dena tapatzen genuen: lotsa, frakasoak eta guretzat deserosoak ziren emozio guztiak”. Garai berriak datoz.

Gazteekin oso exijente jokatzen dugu itxurakeriaren garaiotan. Hori ulertzeko, Maitane Ormazabal psikologoak ideia gako bat jarri du mahai-gainean: gazteen porrotaren bidez, gurasoen porrota ikusten da. Baina familia ez da eragile bakarra: kuadrillak, eskolak eta herriak ere badute zeresana. Gazteengan eragiten duten sistema guztiei begiratu die, banan-banan, gizartearen isla baita gazteen osasun mentala.

Gurasoak, batzuetan, galduta sentitzen gara seme-alaben zailtasunen eta nahasmenduen aurrean. Erruduntasunera kateatuta, zurrunbilo batean bezala sentitzen gara. Maitane Ormazabal psikologoak seme-alabei laguntzeko gakoak aletu ditu hemen. Asko aipatu ditu, baina hauxe da horietako bat: zauriei beldurrik gabe begiratzea.